Albert Krasniqi nga Instituti Demokratik i Kosovës përmes një postimi në profilin e tij në facebook ka shkruar se presidenti i vendit, Hashim Thaçi ka shkelur Kushtetutën me vonesën në emërimin e anëtarëve të Komisionit Qendror të Zgjedhjeve, shkruan arbresh.info.

Sipas tij në këtë rast, do të duhej që të paktën tridhjetë deputetë t’i drejtohen Gjykatës Kushtetuese për shkelje serioze të Kushtetutës nga ana e Presidentit.

Ky është statusi i tij i plotë në facebook:

“Presidenti, në mesin kompetencave të përcaktuara me Kushtetutë, ka edhe:

– Garantimin e funksionimit kushtetuese të institucioneve të përcaktuara me Kushtetutë; dhe

– Emërimin e Kryetarit të Komisionit Qendror të Zgjedhjeve.

KQZ është institucion i pavarur kushtetuese. Kryetares dhe të gjithë anëtarëve të tjerë, tashmë iu ka përfunduar mandati. Presidenti ende nuk ka emëruar anëtarët e rinj.

Duke qenë se asnjëri prej anëtarëve të KQZ-së nuk ka mandat, ky institucion nuk është funksional.

Kësisoj, duke mos ushtruar kompetencat e tij (të emërimit të Kryetarit të KQZ-së), Presidenti ka shkelur Kushtetutën pasi ka penguar funksionimin kushtetues të KQZ-së.

Në këtë rast, do të duhej që të paktën tridhjetë deputetë t’i drejtohen Gjykatës Kushtetuese për shkelje serioze të Kushtetutës nga ana e Presidentit”, ka shkruar ai në facebook./arbresh.info/