Situata në zonën e përmbytur në Shkodër vazhdon të jetë e rënduar ndaj Ministria e Mbrojtjes ka shtuar forcat operacionale dhe mjetet në ndihmë të banorëve.

Përveç forcave operacionale aty ka arritur dhe një grup i batalionit komando në ndihmë të banorëve.

Siç raporton Bashkia e Shkodrës, gjatë natës janë rrëzuar disa shtylla elektrike, për shkak se prej ditësh janë të mbuluara nga uji dhe për rrjedhojë fshatra të tëra janë pa energji elektrike.

Sipërfaqja e përmbytur vazhdon të jetë rreth pesë mijë hektarë tokë dhe 400 shtëpi janë të rrethuara nga uji.

Ministria e Mbrojtjes raporton se gjatë natës janë vendosur mbi 2 mijë thasë me rërë në argjinaturën e Pentarit, shkruan Tv Klan.

Rrugët Shirq-Darragjat, Belaj-Pentar, Bishti i Qarrit dhe Urrela janë të bllokuara. Në disa shkolla, në ambientet e brendshme ka prezencë uji.

Kurse në qytetin e Shkodrës në zonën e Livadheve ndodhen mbi 70 shtëpi me prezencë uji afër oborreve të tyre. Në Anën e Malit ujësjellësit janë jashtë funksionit dhe banorët kanë nevoja urgjente për furnizimin me ujë të pijshëm.

Një lagje në Obot është plotësisht e bllokuar. Në Bërdicë gjithashtu janë shtuar problemet.

Në rrugën nacionale ka dalë uji dhe kërkohet ndërhyrje.