Deputeti i Kuvendit të Kosovës nga radhët e AKR-së, Islam Pacolli ka thënë se lajmi për arritjen e konsensusit për ratifikimin e marrëveshjes për demarkacion me Malin e Zi, në prag të vizitës së delegacionit të BE-së tregon se Republika e Kosovës mbetet e përkushtuar për ndërtimin e fqinjësisë së mirë dhe përmbushjen e kushteve për liberalizimin e vizave dhe integrimin e BE-së.

Pacolli poashtu ka thënë se AKR dhe presidenti i kësaj partie, Behgjet Pacolli vazhdimisht kanë bërë thirrje për gjetjen e konsensusit për ratifikimin e kësaj marrëveshje, përcjell arbresh.info.

Postimi i plotë:

“Demarkacioni me Malin e Zi mbetet tema qendrore e tre viteve të fundit në politiken kosovare, e cila ka polarizuar skajshëm qëndrimet e klasës politike. Lajmi për arritjen e konsensusit për ratifikimin e marrëveshjes për demarkacion me Malin e Zi, në prag të vizitës së delegacionit të lartë të BE-së, rikonfirmon qëndrimin dhe synimin e klasës politike, në veçanti të Qeverisë së Kosovës për të përmbushur obligimet e saja dhe dërguar sinjal të qartë që Republika e Kosovës mbetet e përkushtuar në ndërtimin e fqinjësi së mirë dhe përmbushjen e kushteve për liberalizimin e vizave dhe integrim në BE.

AKR dhe Presidenti z.Behgjet Pacolli në vazhdimësi ka bërë thirrje për gjetjen e konsensusit politike për ratifikim e marrëveshjes në fjalë si dhe afrimin politik të të gjitha partive për gjetjen e zgjidhjeve për tema me interes nacional të cilat trasojnë rrugën e integrimit të vendit në BE, si dhe përçojnë mesazh të qartë të bashkëpunimit e partneritetit me Shtetet e Bashkuara të Amerikës dhe partneret e tjerë.

Konsensusi i sotëm i klasës politike duhet të reflektoj edhe në procese tjera me rëndësi, dhe kjo bëhet vetëm nëse në krye të tyre qëndrojnë lider vizionar”, ka shkruar Pacolli në facebook.