Deputeti i NISMA-s për Kosovëm , Zafir Berisha, thotë se nuk është për t’u çuditur fakti që presidenti Hashim Thaçi ka ndryshuar qëndrimin e tij për zhbërjen e Gjykatës Speciale, pasi sipas tij nuk është hera e parë që ai i ndryshon fjalët.

“Thaçi është kthy në pikën zero, qaty ku ka qenë. Nuk është për me u çuditë, nuk është hera e parë që i lunë fjalët e që bënë akrobacione të tilla”, ka deklaruar Berisha.

Berisha thotë se ndryshimi i qëndrimeve të presidentit Thaçi tregon për karakterin e pa qëndrueshëm të tij.

“Unë jam nënshkrues, dhe nuk e kam nënshkruar atë për Hashim Thaçin. Unë kam qenë kundër edhe në 2015-ën edhe tash jam kundër. Ai i ka shti në 2015-tën me votu me çdo kusht me e votu për një gjykatë të dëmshme. I ka shti me marrë edhe iniciativë dhe i la tash. Një njeri që po e tregon dalëngadalë karakterin e tij të pa qëndrueshëm ”, është shprehur Berisha për Periskopin.

I pyetur nga Periskopi se si e komenton faktin që edhe kryeministri Haradinaj dhe kryekuvendari Veseli kanë ndryshuar qëndrim rreth nismës për zhbërjen e Gjykatës Speciale, Berisha ka thënë se nëse e kanë ditur qysh në fillim se nuk mund ta bëjnë një gjë të tillë, nuk është dashur që të luhet me ndjenjat e qytetarëve.

“Unë mund të flas vetëm për veti që nuk e kam ndryshuar qëndrimin. Por nuk është mirë që me lujtë me ndjenjat e qytetarëve për çështje të rëndësishme për vendin siç është çështja e Gjykatës. Plotësisht pajtohemi që është gjykatë e dëmshme një etnike, por nëse e kanë ditë që nuk munden me e zhbë, së paku nuk është dashtë me e torturuar për një muaj ditë qytetarin e Kosovës me deklarata dhe ide koti”, ka përfunduar Berisha për Periskopin.

Sot, presidenti i vendit Hashim Thaçi në një konferencë për media, ka thënë që nuk ka qenë nismëtar për zhbërjen e Gjykatës Speciale.

Në një linjë me Thaçin tashmë janë edhe Haradinaj e Veseli.