Lëvizja Vetëvendosje ka pësuar një goditje të rëndë pas publikimit të mesazhit ku nënkryetarja Aida Dërguti e kishte thirrur Albin Kurtin me fjalë fyese.

Ky mesazh vuri në pah përçarjet në këtë parti e cila ka numrin më të madh të deputetëve në Kuvendin e Kosovës pas zgjedhjeve parlamentare të 11 qershorit, shkruan Arbresh.info.

Zyrtarë të saj të lartë dhanë dorëheqje një pas një në muajt e fundit të vitit 2017 e po ashtu në fillim të vitit 2018.

Kryetari Visar Ymeri, nënkryetari i parë, Dardan Sejdiu e zyrtarë të tjerë si kryetari i Kamenicës Qëndron Kastrati dhe deputetët Shqipe Pantina, Driton Çaushi e Frashër Krasniqi janë ata që hoqën dorë nga partia.

Është përfolur shumë edhe për kryetarin e Prishtinës Shpend Ahmeti se i përket këtij ose atij fraksioni.

Mirëpo, deri më tani, nuk është parë asnjë veprim nga ana e tij në këtë drejtim.

I pyetur sot nga Arbresh.info, Ahmeti ka thënë se nuk dëshiron të deklarohet për zhvillimet e fundit në partinë të cilës i përket pasi, siç ka thënë, është duke u munduar t’i rregulloj punët.

Të dielën që po vjen, zhvillohen zgjedhjet për kryetar të Lëvizjes.

Deri më tani, kandidaturën e tij për kryetar e ka paraqitur vetëm Albin Kurti./Arbresh.info