Qeveria e Kosovës ka përcjellur në Kuvendin e Kosovës Projektligjin për Buxhetin e Republikës së Kosovës për vitin e ardhshëm.

Ky buxhet do të jetë 2 miliardë e 82 milionë euro, raporton arbresh.info.

Kuvendi i Kosovës ende nuk ka miratuar në lexim të dytë rishikimin e buxhetit të këtij viti.

Debat i gjatë i ka paraprirë miratimit në lexim të parë shkaku i tërheqjes së parave në projektin për autostradën drejtë Gjilanit dhe sigurimet shëndetësore, duke kaluar në fondin për pagesa të pensioneve të veteranëve.

Projekti i autostradës drejtë Gjilanit  sipas Ministrit të Financave, Bedri Hamza, është i përfshirë në buxhetin e vitit të ardhshëm.

Por, një ditë më parë Komisioni për Buxhet dhe Financa ka rikthyer buxhetin për ndërtimin e autostradës Prishtinë -Gjilan në vlerë prej 1 milion e 800 mijë euro. Kjo u bë e ditur të hënën në mbledhjen e rregullt të Komisionit për Buxhet të cilët miratuan raportin me amandamente për projektligjin për ndryshim dhe plotësim të Ligjit për Buxhetin e Kosovës.

Janë rikthyer edhe mjetet e planifikuara për sigurimet shëndetësore.

“Në tabelën 3.1, shtohet Nën-programi “Kontigjenca e Sigurimeve Shëndetësore”, me kod 28200, kategoria e pagave dhe mëditjeve dhe shuma prej 11,000,000 euro”, thuhet në amendamentin e miratuar në Komisionin për Buxhet dhe Financa./arbresh.info/