49 për qind e qytetarëve të Kosovës në pyetjen se “Cila është arsyeja kryesore pse nuk janë aktivisht të përfshiurë në marrjen e vendimeve qeveritare?” janë përgjigjur se “S’më interesojnë asnjëherë vendimet qeveritare”.

Për dallim nga Kosova, në Kroaci 60 për qind nuk përfshihen në vendim marrje për shkak se mendojnë se individualisht nuk mund të ndikojnë në vendimet qeveritare.

Në Shqipëri, 31 për qind e qytetarëve thonë se nuk janë aktivisht të përfshirë, për shkak se nuk duan të ekspozohen publikisht.

Këshilli i Bashkëpunimit Rajonal (RCC), për të tretin vit me radhë, ka publikuar Barometrin e Ballkanit, një hulumtim vjetor i opinionit të publikut dhe bizneseve në shtetet e Ballkanit: Shqipëri, Bosnjë dhe Hercegovinë, Kroaci, Kosovë, Mali i Zi, Maqedoni dhe Serbi. Në këtë edicion janë përfshirë 8000 qytetarë dhe 1600 kompani.

Barometri i Ballkanit 2017 ofron të dhënat e mbledhura dhe të analizuara në një sërë fushash tematike dhe paraqet përcepcionin aktual për aspiratat dhe pritjet e popullsisë dhe komunitetit biznesor të Evropës Jug-Lindore për jetën, tregun e punës, trendet socio-ekonomike dhe politike si dhe integrimin evropian.

Ndër indikatorët e matur, Barometri i Ballkanit 2017 sjellë edhe vlerësimin e besueshmërisë në institucionet publike dhe përcepcionin përkitazi me pavarësinë e tyre./arbresh.info/