Zëvendëskryeministri i Parë, njëherësh Ministër i Jashtëm i Kosovës, Behgjet Pacolli, në kuadër të vizitës së tij në Shqipëri, përpos takimeve me liderët institucionalë, ka takuar edhe Kryetarin e Parisë Demokratike, njëherësh lider i opozitës, Lulzim Basha, si dhe ish-Kryeministrin, Sali Berisha.

Në të dyja këto takime është diskutuar lidhur me progresin e arritur në marrëdhëniet në mes dy vendeve, si dhe lidhur me intensifikimin e përpjekjeve të reja nga të dyja anët për të avansuar edhe më tej fuqizimin e marrëdhënieve, bën të ditur një njoftim nga MPJ e Kosovës.

Basha ka shprehur kënaqësinë e tij lidhur me takimin me Pacollin, si dhe ka shprehur gatishmerinë për të kontribuar në të gjitha proceset nëpër të cilat po kalon Kosova.

Basha, gjithashtu, ka theksuar nevojën e thellimit të bashkëpunimit ekonomik mes Kosovës dhe Shqipërisë, si dhe ka kërkuar heqjen e barrierave tregtare si dhe lehtësimin e lëvizjeve kufitare, thekson njoftimi i MPJ.

Pacolli, gjatë takimeve me liderin e Partisë Demokratike, ka përkrahur idenë e thellimit të bashkëpunimit ekonomik përmes krijimit të pikave të përbashkëta doganore, sikurse ajo në Durres si dhe lehtësimin e lëvizjes së lirë të shtetasve nga të dyja anët.

E, gjatë takimit me Ish-Kryeministrin Berisha, ky i fundit i ka uruar sukses Pacollit për detyrën e re, duke shprehur besimin që ai dhe qeveria e tij do të kenë sukses, vecanërisht në fushën e njohjeve, në të cilën, sipas tij, në dy vitet e fundit ka pasur stagnim.

Të dy bashkëbiseduesit kanë rënë dakord për rëndësinë e bashkëpunimit ekonomik pa barriera mes dy vendeve dhe të hekurudhës si ndërlidhje të ekonomisë së Kosovës me portet.

Pacolli ka ftuar Berishën dhe Bashën që ta vizitojnë Kosovën.