Nesër në ora 11:30 në Bibliotekën Kombëtare “Pjetër Bogdani” në Prishtinë promovohet libri i zëvendës ambasadorit të Kosovës në Gjermani Astrit Zemaj me titull “Evropa në udhëkryq, Lindja dhe ngritja e Rajhut të Tretë në Gjermani, 1918-1939”, shkruan arbresh.info

Përmes këtij libri autori sjellë studimin e gjendjes në Gjermani nga këndvështrimi politik, ushtarak dhe ekonomik, ndërmjet dy luftërave botërore, 1918-1939.

Libri i autorit Zemaj, që para pak ditësh doli në tregun e librit, përbëhet nga gjithsej nëntë kapituj dhe përgjatë tyre analizon sfondin e përgjithshëm dhe dinamikat politike, ekonomike dhe diplomatike, që çuan në shkatërrimin e Republikës së Vajmarit dhe në kapjen e shtetit gjerman nga Adolf Hitleri dhe Partia Nacionalsocialiste.

Autori përmes librit të tij vë në spikamë Marrëveshjen e Versajës dhe ndjenjën e përuljes që ajo shkaktoi në Gjermani, krizën ekonomike, trazirat dhe përplasjet kronike politike, si dhe çorientimin e diplomacisë së fuqive të mëdha të kohës, që për pasojë kishte indiferencën ndaj zhvillimeve në Gjermani./arbresh.info/