Pamjet e një gruaje që tërhiqet nga treni në platformë, pasi çanta e saj ngeci tek dera, kanë ngritur shqetësime serioze për sigurinë e metrosë në Romë.

Natalya Garkovich, 43 vjeç u shtrua në pavijonin e reanimacionit për shkak të këtij incidenti, por tashmë është jashtë rrezikut për jetën.

Autoritetet italiane thanë se sensorët nuk e diktuan çantën e saj të mbetur në derë dhe rrjedhimisht frenat nuk u aktivizuan. Në një tjetër video që disponohet nga autoritete shfaqet drejtuesi i trenit Gianluca Tonelli, që është duke ngrënë para se të niset, megjithëse ai thotë se kontroloi pasqyrat dhe nuk u nis në mënyrë të pakujdesshme.

Në video shfaqet qartë Garkovich që tenton të ngjitet në tren dhe më pas ndryshon mendje dhe tenton të dalë. Por dera e trenit kap çantën e saj dhe pavarësisht përpjekjeve të njerëzve në platformë, treni e merr atë me vete.

Ajo që mediat theksojnë më shumë është fakti se pasagjerët në tren tërhoqën frenat e emergjencës, pasi e vunë re gruan në telashe, por treni nuk u ndal, pasi sistemi i emergjencës mesa duket ishte jashtë funksioni.