Vdekja e kosovarit nga Kaçaniku, Lavdrim Muhaxheri, pjesëtar i ISIS-it, është cilësuar si fatkeqësi.

Njohësi i çështjeve të sigurisë, Burim Ramadani ka thënë se Lavdrim Muhaxheri është shembull që nuk duhet ndjekur.

“Fundi i terroristëve gjithnjë është i keq. Dhe, i keq do të jetë gjithnjë. Është fatkeqësi që një djalë i ri shqiptar nga Kosova ka arritur të kthehet në një gjendje të tillë, duke terrorizuar popullatën civile të pafajshme në Siri. Askush nuk duhet ta ndjek shembullin e Lavdrim Muhaxherit. Është modeli se si nuk duhet të veprojnë të rinjtë e Kosovës”, ka thënë ai.

Ramadani është shprehur se organizata terroriste ISIS, bashkë me pjesëtarët e saj u kanë shkaktuar shumë vuajtje mijëra njerëzve të pafajshëm në botë.

Tutje, ai u ka bërë thirrje të rinjve kosovarë që të vazhdojnë shkollimin për një jetë më të mirë në të ardhmen.

“Është fatkeqësi po ashtu ekzistenca në botë e këtyre organizatave terroriste, sikurse ISIS-i, që i ka shkaktuar dhimbje dhe vuajtje qindra-mijëra njerëzve të pafajshëm nëpër botë. Të rinjtë e Kosovës kanë jetën përpara. Duhet shkollohen e të angazhohen për jetë të mirë, familje dhe të ardhme”, ka deklaruar Ramadani

Ndryshe, Lavdrim Muhaxheri është raportuar të jetë vrarë gjatë një sulmi kundër ISIS-it nga forcat amerikane. Familja e Muhaxherit në Kaçanik sot ka hapur të pamen.