Ky është viti i katërt radhazi në të cilin hapet Panairi i Punës në Tiranë dhe mbi 80 kompani publike janë pjesë e tij.

Panairi, sic është bërë traditë tashmë hapet në mjediset e Pallatit të Kongreseve në Tiranë, ku secila kompani ka ofertat e saj për punëmarrës potencialë.

Disa prej vendeve vakante që zënë pjesën më të madhe të ofertave janë : Operatorë telefonikë, vrojtues plazhi, inxhinierë elektrikë, shoferë e deri te mësues, infermierë dhe financierë janë këto disa prej pozicioneve të punës që ofrohen nga biznesi.

Këtë vit “trofeu” i kërkesave për punësim ka kaluar në duart e federatës “Vrojtuesit e plazhit dhe shpëtimit në ujë”, e cila prezantohet në panair me rreth 2 mijë vende të lira, punësim sezonal kryesisht për të rinjtë.

Të interesuarit duhet fillimisht të licencohen, dhe kjo bëhet nëpërmjet regjistrimit e ndjekjes së një kursi në qendrën e formimit profesional. Nga një vështrim i bërë në çdo stendë, është e pamundur të mos bjerë në sy po ashtu fakti se edhe këtë vit kompanitë call center zënë një vend të rëndësishëm në tablonë e ofertave, me kërkesa që variojnë nga 100 deri në 500 vende.

Duket se ligji italian i miratuar në fund të vitit të kaluar për largimin e këtyre kompanive nga vendet jo anëtare të Bashkimit Europian, nuk ka impaktuar njësoj te të gjitha. Një pjesë prej tyre vijojnë ende të jenë pjesë e tregut vendas, duke kërkuar që të rekrutojnë kryesisht të rinjtë, që janë njohës të mirë të gjuhës italiane dhe asaj angleze. Pas tyre, bazuar në nivelin e kërkesës, mund të renditen kryesisht bizneset fason dhe kompanitë e transportit me rreth 50 vende.

Më pak hapësirë për punësim është tek institucionet shtetërore. Instituti i Statistikave ka në dispozicion 37 vende të lira, që konsistojnë në pozicione si anketues, operatorë dhe kontrollorë të anketave dhe vrojtimeve që INSTAT kryen.