Presidenti i Kosovës, Hashim Thaçi ka shprehur ngushëllime për familjen Agolli, menjëherë pas lajmit për vdekjen e Dritëro Agollit.

Thaçi ka thënë se Dritëro ishte autentik në krijimtari artistike, po ashtu edhe në bindjet e tij politike.

“Kultura shqiptare mbeti pa njërin nga titanët e mëdhenj”, ka shkruar ai.

Më poshtë gjeni postimin e plotë në Facebook:

Me pikëllim mora lajmin për vdekjen e Dritëro Agollit.

Para disa muajve pata një takim të ngrohtë me Dritëron në Tiranë, me shkrimtarin, poetin dhe intelektualin e shquar kombëtar që pas vete la një trashëgimi të madhe shpirtërore.

Ai ishte autentik në krijimtari artistike, por edhe në bindjet e tij politike.

Bota shqiptare në veprën e tij letrare u trajtua estetikisht me dimensione të thella, duke shpërfaqur fatin e njeriut tonë, jetën, vdekjen, punën e mbi të dashurinë ndaj atdheut.

Kultura shqiptare mbeti pa njërin nga titanët e mëdhenj.

Ngushëllimet më të sinqerta për familjen Agolli! HTH