Një plagosje me armë zjarri ishte raportuar gjatë ditës së djeshme nga Policia e Kosovës, rast ky i ndodhur me datën 30 janar në orën 21:30 në rrugën “Arben Ramadani” në Gjilan.

Burime të Indeksonline bëjnë të ditur se personi i plagosur me inicialet G.R., që jeton në lagjen Arbëria të Gjilanit, student në Universitetin e Prishtinës, ka plagë në pjesën e kokës. Plumbi i depërtuar në pjesën e kokës ka mbetur ende aty duke rrezikuar jetën e viktimës.

I plagosuri i moshës 23 vjeçare është goditur me armën e llojit ‘Ekol Tuna’, e cila edhe është konfiskuar.

I plagosuri që nga data 30 janar vazhdon të jetë i shtrirë në Qendrën Klinike Universitare të Kosovës në gjendje kome.

Gjithnjë sipas burimeve të Indeksonline, njëri nga personat e dyshuar të këtij rasti, ishte i burgosur edhe më parë.

Ndryshe Policia ka bërë të ditur se menjëherë pas rastit, dy të dyshuarit e këtij rasti janë arrestuar dhe me urdhër të prokurorit janë dërguar në mbajtje.