Rasti Haradinaj si shembull se sa problematik është juridiksioni i Serbisë për krime lufte

07:43 | 10 Janar 2017
M. A.

Edhe pse ishte menduar që të jetë diskutim rreth arritjeve dhe sfidave të Kosovës dhe të Serbisë në rrugëtimin e tyre drejt përafrimit me Bashkimin Evropian, në debatin në Komisionin e Politikës së Jashtme të Parlamentit Evropian, të hënën mbrëma, tema më e përfolur ishte rasti Haradinaj.

Ndalja e tij nga autoritetet e Francës, sipas urdhër arrestimit nga Serbia, ka krijuar shqetësim te disa deputetë, të cilët druajnë se kjo mund të shkaktonte kthesë prapa në procesin e normalizimit të raporteve mes Kosovës dhe Serbisë.

Kështu është shprehur deputeti nga Britania e Madhe, Charles Tannock.

Raportuesja për Kosovën, Ulrike Lunaçek, ka përsëritur thirrjet që Serbia t’i tërheqë fletë arrestimet e vjetruara dhe ka thënë se Ligji për juridiksion i cili i jep Serbisë mundësi të akuzojë personat nga e gjithë ish-Jugosllavia është shumë problematik.

Lunaçek u shpreh se Serbia nuk ka juridiksion ndaj Kosovës.