Aktivistët e shoqërisë civile prej disa orësh janë vendosur përpara Parlamentit ku do të qëndrojnë gjithë natën për të kundërshtuar ligjin e Qeverisë për importin e mbetjeve.

Në protestë marrin pjesë edhe gazetarë, artistë e aktorë, të cilët i janë bashkuar kauzës për të mos lejuar që në Shqipëri të përpunohen plehrat e Europës.

Ligji i qeverisë për importin e mbetjeve është kundërshtuar nga Presidenti Nishani dhe është kthyer për rishqyrtim në Parlament. Por, edhe pse ka kaluar afati i caktuar për të hyrë në votim, Qeveria nuk e ka dërguar ligjin. Nesër është seanca e fundit e sesionit parlamentar për këtë vit dhe ishte parashikuar që të kalonte për votim dekreti i Presidentit për ligjin e mbetjeve.

Por, Kuvendi sot njoftoi që ligji për importin e mbetjeve nuk do të jetë as në seancën e nesërme në Parlament, por do të diskutohet në Janar 2017.

E megjithatë, aktivistët e shoqërisë civile janë të vendosur ta vazhdojnë protestën dhe të qëndrojnë përpara Parlamentit kundër këtij ligji.