Shërbimi Korrektues i Kosovës, përmes një komunikate ka shprehur shqetësimin e thellë për deklaratat dhe akuzat, siç thuhet të pabaza të adresuara ndaj zyrtarëve të Shërbimit Korrektues në Qendrën e Paraburgimit në Lipjan.

Reagimi i Shërbimit Korrektues të Kosovës vie pas lëshimit të një komunikate nga Lëvizja Vetëvendosje, ku thuhet se aktivisti i tyre Atdhe Arifi po terrorizohet në burgun e Lipjanit.

“Shërbimi Korrektues i Kosovës, njofton opinionin publik se nuk ka asnjë “terrorizim” apo sjellje të pahijshme të zyrtarëve korrektues ndaj të paraburgosurve.

Të paraburgosurit nuk “po enden nëpër zyra të ndryshme” siç po pretendon Lëvizja Vetëvendosje, por po dërgohen për ekzaminime të rregullta si pjesë e procedurave të paraburgimit.

Shërbimi Korrektues ka marrë masa shtesë mbikëqyrëse dhe të kujdesit ndaj të paraburgosurve. Kujdesi i shtuar i zyrtarëve korrektues, është në funksion të sigurisë së të paraburgosurve dhe asnjëherë nuk ka tendenca keqtrajtimi.

Për hir të transparencës, Ministria e Drejtësisë fton Zyrën e Avokatit të Popullit dhe KMDLNJ-në që të bëjnë vizita në Qendrën e Paraburgimit në Lipjan dhe të verifikojnë gjendjen e të paraburgosurve dhe sjelljet e zyrtarëve korrektues”, thuhet në komunikatën e Shërbimit Korrektues të Kosovës, transmeton KosovaPress.

Lëvizja Vetëvendosje nëpërmjet një komunikate për media, sot ka shpreh shqetësimin për siç thuhet terrorizimin që është duke iu bërë aktivistit Atdhe Arifi, i cili gjendet në paraburgim në burgun e Lipjanit.

“Sot, me shqetësim morëm informacione se Atdhe Arifi, i burgosur padrejtësisht, po terrorizohet psiqikisht në mënyrë të vazhdueshme nga autoritetet e burgut të Lipjanit, ku po mbahet padrejtësisht.

Familja e aktivistit Atdhe Arifi, që e kishte vizituar sot atë, na tregoi që Atdheu po provokohet nga zyrtarët e burgut, të cilët gjatë gjithë kohës i futen në dhomë, e marrin nëpër zyra të ndryshme, e terrorizojnë pas mesnate duke hyrë në dhomën e tij me bateri dore, dhe në vazhdimësi i thonë ‘mos bëj vetëvrasje edhe ti, siç ka bërë Astriti’,” thuhet në komunikatën e Vetëvendosjes.