Me datë 17 tetor, policia në Prizren ka kuptuar përmes portalit Balkanplus.net në gjuhën boshnjake e që ishte shpërndarë edhe në mjete tjera  të informimit se zyrtari i arsimit A. S. në gjuhen boshnjake në Drejtorinë e Arsimit në Prizren, kishte informuar se me datën 13 tetor, rreth orës 19:10 minuta në oborrin e shkollës persona të panjohur të armatosur dhe të maskuar kanë hipur në autobusin e “Zhupa Trans” dhe kanë tentuar ta rrëmbejnë një nxënëse të komunitetit boshnjak me mësim në Shkollën e Mesme të Mjekësisë “Luciano Motroni” në Prizren, transmeton Indeksonline.

Hetues policorë, pas pranimit të informatës dhe në konsultim me prokurorin e shtetit kanë nisur me hetimin e rastit. Gjatë intervistave me të përfshirët në rast nuk janë konfirmuar pretendimet e zyrtarit të arsimit për tentim të rrëmbimit të nxënëses. Dyshohet se informacioni i dhënë mund të jetë lansuar për qëllime politike. Lidhur me këtë rast, policia e Prizrenit ka deponuar kallëzim penal në prokurori për deklarim të rrejshëm, thuhet në njoftimin e policisë.