Policia e Kosovës për rajonin e Prizrenit ka publikuar fotografitë e dy personave të kërkuar për vjedhje të rënda në këtë rajon.

“Drejtoria Rajonale e Policisë në Prizren kërkon nga qytetarët të cilët mund të kenë njohuri për vendqëndrimin e këtyre dy personave të dyshuar të cilët janë në kërkim për vepra të ndryshme penale kryesisht vjedhje dhe grabitje të njoftojnë policinë e Kosovës përmes telefonit 192 ose stacionin më të afërt”, njofton Policia e Kosovës.

Ambroz Pjetër Morina dhe Driton Ali Bytyqi, njofton PK-ja, dyshohet se i takojnë një grupi të organizuar prej katër apo më shumë personave, të cilët kanë kryer shumë vjedhje nëpër Kosovës.

Dyshja janë të njohur për grabitjen e armatosur në një shtëpi në rrugën “Hoxhë Tasini” në Prizren që kishte ndodhur më gjashtë tetor.

Ata kanë vjedhur një shumë të konsiderueshme të parave dhe stolive të arit.

Policia ka arritur që dy të dyshuar nga grupi të arrestohen ndërsa dy të tjerë janë në kërkim. Sipas informatave që i posedon polica të dyshuarit janë të armatosur dhe të dhunshëm.