Mustafa thotë se në Nju Jork mori mbështetje për vizat dhe proceset euroatlantike

17:53 | 27 Shtator 2016
M. A.

Kryeministri i Kosovës, Isa Mustafa, ka bërë një rezyme të takimeve që ka zhvilluar gjatë javës së kaluar në Nju Jork, ku ka marr pjesë në punimet e Asamblesë së Përgjithshme të OKB-së.

Mustafa ka thënë se gjatë qëndrimit në Nju Jork, në takimet e shumta ka marr përkrahje nga miqtë e Kosovës, për liberalizmin e vizave, proceset integruese dhe njohje të reja, transmeton lajmi.net.

Postimi i plotë i Mustafës:

Të dashur miq,

Javën që lamë pas isha në Nju Jork, ku së bashku me ministrin Hoxhaj, kemi zhvilluar takime të nivelit më të lartë me liderë të shteteve, organizatave ndërkombëtare dhe përfaqësues të diasporës.

Pata rastin të takohem me Presidentin Obama, Presidentin Clinton, Sekretarin Kerry, Sekretarin e Përgjithshëm të Kombeve të Bashkuara, Mbretin e Jordanisë, Presidentin e Këshillit Evropian, Përfaqësuesen e Lartë për Politikë të Jashtme të BE-së, drejtuesit e organizatave rajonale, presidentë, kryeministra dhe ministra të jashtëm të shumë shteteve.

Takova përfaqësuesit e diasporës sonë në Javën e Filmit Shqiptar si dhe në takimin e Rrjetit të Bizneseve të Diasporës Shqiptare.

Morëm përkrahjen e plotë të SHBA-ve dhe vendeve të tjera partnere e të organizatave ndërkombëtare.

Na u rikonfirmua mbështetja për proceset euroatlantike, liberalizimin e vizave dhe proceset tjera vitale për qytetarët.

Presim fuqizim të subjektivitetit ndërkombëtar përmes njohjeve të reja dhe anëtarësimit në organizata.

Duke iu referuar thënies brilante të Presidentit Historik, Ibrahim Rugova, se “Shtëpia nuk mund të mbahet pa miq”, me krenari e them se Republika e Kosovës ka sot më shumë miq se kurdoherë tjetër.