Me rastin e 7 Majit, shënimit të Betejës së Çabratit dhe përkujtimit të martirëve të vrarë në këtë datë, sot drejtues të Komunës së Gjakovës dhe ish-bashkëluftëtarë të martirëve të luftës së UÇK-së, bënë homazhe te varrezat e dëshmorëve të Brigadës “137 Gjakova”, për të vazhdar me homazhet në Kodrën e Çabratit. Po ashtu, u organizua një akademi përkujtimore në nderim të të rënëve.

Me këtë rast, në akademinë përkujtimore, kryetarja e Komunës së Gjakovës, Mimoza Kusari-Lila tha se kjo datë është një konfirmim i asaj se si u lufta në Gjakovë.

Kusari tha se për t’u çliruar nga okupatori serb, u luftua në çdo cep të Gjakovës.

“Në mesin e shumë ditëve të shënuara në Komunën e Gjakovës, 7 maji ka një vlerë dhe rëndësi të veçantë. 7maji është një konfirmim i asaj se si u luftua në Komunën e Gjakovës, se liria i kushtoi shumë shtrenjtë Gjakovës dhe në çdo cep të saj, si në fshat si në qytet, si në çdo skutë është luftu… Sot, 17 vjet pas kësaj dite të lavdishme ne përkulemi dhe i nderojmë me respektin maksimal ata që nuk janë më, ata që lanë gjymtyrët dhe sot janë invalidë të luftës”, tha ajo.

Ndërsa, deputeti në Kuvendin e Kosovës dhe ish-luftëtari i UÇK-së, Lahi Brahimaj tha se kishte fatin të njoh pjesën dërrmuese të të rënëve që sot u përkujtuan në Gjakovë.

Brahimaj tha se djemtë e Gjakovës, të rënë në luftën e fundit e kanë vendin në rendin flijimeve të lavdishme që bënë familja Jashari dhe Haradinaj.

“Kisha fatin të njoh pjesën dërmuese të këtyre djemve që sot po i përkujtojmë. Nëse Ushtrisë Çlirimtare i bëhet një histori, pjesë të veçantë kanë djemtë e Gjakovës. Ne sot jemi mbledh të përkujtojmë ushtarët e Brigadës 137, por Gjakova kishte më shumë se kaq. Nëse ndahet Ushtria Çlirimtare në tri pjesë, kemi marsin e lavdishëm të jasharëve, marsin e lavdishëm të haradinajve dhe është marsi i lavdishëm i djemve të Gjakovës”, tha Brahimaj.

E komandanti i Brigadës “137 Gjakova, Agron Kryeziu tha se grupi i luftëtarëve nga Gjakova ishte pozicionuar në katër lokacione të qytetit.

Në fjalën e tij, Kryeziu tha se me fillimin e bombardimeve të NATO-s situata ishte përkeqësuar në Gjakovë. Sipas tij, ishte vendosmëria e kësaj brigade ajo që bëri që forcat serbe të zmbrapsen nga ofensiva, përkundër armatimit të dobët që posedonin djemtë e Gjakovës.

“Për ne kjo ditë do të thotë shumë…. Me fillimin e bombardimeve të NATO-s situata u përkeqësua në qytetin e Gjakovës. Na vinin informacione se situata nuk ishte e mirë, vriteshin njerëz dhe qytetarë të paarmatosur, digjeshin shtëpitë dhe ne u mblodhëm me bashkëluftëtarët dhe bashkëbiseduam, dhe me të ndjerin Abudllah Babalia morëm vendim që të shkojmë të komandanti i zonës, Ramush Haradinaj që të kërkojmë që të hyjnë në qytetin e Gjakovës. Kështu vendosëm dhe më 28 mars u formua brigada ‘137 Gjakova’… Vendosmëria e brigadës 137 Gjakova ishte që ne t’iu kundërvihemi dhe mos t’i lëmë që bash aq kollaj të hyjnë. Edhe pse ishim me armatim jo shumë të fortë, ne ia arritëm që ne t’i mposhtim dhe t’i kthejmë kokulur (forcat serb)”, tha Agron Kryeziu.

Familjarët e dëshmorëve falënderuan të pranishmit. Një familjare e një dëshmorit të kësaj brigade, tha se krenaria për dëshmorët nuk lejon që t’i tradhtojë loti.

Ajo tha se mburret me veprat e tyre.

“Jam krenare. Krenaria që kemi nuk na lë që loti të në rrjedhë në faqe. Nuk na lë që të vajtojmë, por megjithë zemër them se mburremi për dëshmorët, mburremi me veprat e tyre… Gjaku i tyre ujiti tokën në të cilë n ecim pa frikë”, tha ajo.

Prezent në akademi ishte edhe Alea e vogël, vajza e komandantit të Brigadës ‘137 Gjakova’, Avdullah Babalia që lindi pasi ndërroi jetë i ati.

Në ato ditë, nga radhët e Brigadës “137 Gjakova”, ranë dëshmorë Ahmet Gjikolli, Agim Haxhiavdyli, Ali Hoxha, Arben Saraqini, Bahri M.Kryeziu, Bujar Roka, Dashmir Krasniqi, Emin Dervishdana, Genc Kepuska, Hazyr Këpuska, Islam Koci, Ilir Berisha, Kushtrim Hoxha, Megzun Boshnjaku, Mentor Shtaloja, Sefedin Xerxa, Tom Gjoka, Taulant Nura , Visar Juniku, Ylber Hoxha, Yllka Domi dhe Hamzë Zymberaj.

Akademia u përcoll edhe me pika artistike.