​Lëvizja Studentore për Barazi, Studim, Kritikë, Veprim ka reaguar pas zgjedhjes së rektorit të ri të Universitetit të Prishtinës, duke përmendur se sot është zgjedhur rektor një ish-anëtar i PDK-së dhe i AKR-së. Kjo lëvizje i ka bërë thirrje rektorit të ri që të jetë i hapur në bashkëpunim me studentët.

Po ashtu, kjo lëvizjes ka kërkuar nga rektori që të jetë këmbëngulës në idenë e reformimit të Arsimit të lartë dhe të angazhohet në mbrojtje të autonomisë universitare, në të kundërtën, SKV-ja paralajmëron se reagimi i studentëve do të jetë i fuqishëm e situata do të jetë e ngjashme si ajo e krijuar nga rektori Gashi dhe të tjerët të llojit të tij.

Ja komunikata e plotë e Lëvizjës Studentore për Barazi, Studim, Kritikë, Veprim

Arsimi i lartë, posaçërisht Universiteti i Prishtinës, vazhdon të jetë në krizë të thellë. Ende po përballet me problemet që e karakterizojnë që nga paslufta e që janë mungesa e aktivitetit të mirëfilltë shkencor, publikimet false të stafit akademik, shndërrimi i Universitetit në kamp militantësh të pushtetit, shkelje flagrante të autonomisë së UP-së etj.

Edhe pse me rrëzimin e rektorit Ibrahim Gashi u hap një mundësi e madhe reformimi, kjo nuk u shfrytëzua. Më tepër, ajo u përmbys nga vegla qeverisëse brenda UP-së. Për më shumë së një vit u luftua me çdo kusht nga senati kriminal çdo hap reformues dhe në anën tjetër Qeveria e Kosovës nuk bëri asgjë për ta jetësuar reformën në arsimin e lartë. Edhe pse u tha nga Ministria e Arsimit se me miratimin e ligjit të ri të arsimit të lartë do të ndryshojë shumëçka, ajo mbeti vetëm si premtim pasi që Lista Serbe, pa hasur në asnjë lloj kundërshtimi nga partnerët e tjerë të koalicionit, pamundësoi miratimin e këtij ligji në Qeveri.

Në vend se të insistohej në miratimin e këtij ligji, Ministria e Arsimit vendosi të kundërtën: hapjen e zgjedhjeve të reja brenda UP-së dhe atë për çdo nivel organizativ. I filluan zgjedhjet të cilat qysh nga fillimi garantonin që përfundimi i tyre që nga studentët e deri te rektori do të përbënin kthim në situata të ngjashme si ato të rektorit Hasani, Rugov a e Gashi e assesi reformim të arsimit të lartë.

Duke pasur parasysh që sot është zgjedhur rektor një ish-anëtar i PDK-së e i AKR-së, pra një ish pjesëtar i pushteteve të pasluftës, ne i bëjmë thirrje rektorit të ri që të jetë i hapur në bashkëpunim me studentët. Kërkojmë nga ky rektor që të jetë këmbëngulës ne idenë e reformimit të Arsimit të lartë dhe të angazhohet në mbrojtje të autonomisë universitare. Në të kundërtën, SKV-ja paralajmëron se reagimi i studentëve do të jetë i fuqishëm e situata do të jetë e ngjashme si ajo e krijuar nga rektori Gashi dhe të tjerët të llojit të tij.