Jusuf Musliu dhe Lul Raka janë të vetmit kandidatë që kanë aplikuar deri më tani për rektor në Universitetin e Prishtinës “Hasan Prishtina”.

Aplikimi për rektor në UP është hapur më 16 shkurt të këtij muaji, mirëpo deri më tani kanë aplikuar vetëm dy kandidat.

Zyrtarët e rektoratit tregojnë për Gazetën Express se Jusuf Musliu dhe Lul Raka janë të vetmit kandidatë që kanë aplikuar për këtë pozitë.

“Jusuf Musliu dhe Lul Raka janë kandidatët e vetëm që kanë aplikuar për rektor deri më tani”- tha sekretari i UP`së, Esat Kelmendi për Gazetën Express.

Aplikimi është i hapur deri nesër më 01.03.2016.

Sipas planit dinamik, rektori do të zgjedhet të premten, më 4 mars, ndërsa mandati i tij do të fillojë më 15 mars dhe do të përfundojë më 30 shtator 2020.

Rektorin e zgjedh Këshilli Drejtues nga lista e kandidatëve të propozuar nga komisioni profesional prej pesë (5) anëtarëve, të cilin komision e formon Senati.

Këshilli Drejtues ka të drejtë ta refuzojë listën e kandidatëve të propozuar nga komisioni profesional duke e arsyetuar atë.

Rektori i UP-së zgjidhet me shumicën absolute (shumicën e anëtarëve të përgjithshëm) në pajtim me dispozitat e këtij Statuti.