Ministri i Bujqësisë, Pylltarisë dhe Zhvillimit Rurual, Memli Krasniqi ka reaguar ndaj sulmeve që po I bëhen ambasadorin amerikan në Kosovë, Greg Delawie.

Ai cilëson këto sulme si neveritëse dhe thotë se çdo tendencë për t’i arsyetuar ato nuk janë në frymën e respektit, mirënjohes dhe miqësisë që institucionet e Kosovës kanë me Amerikën.

Krasniqi thotë se kushdo që mundohet të ndryshojë kursin e miqësisë “së përhershme të Kosovës dhe SHBA-të do të përfundojë në plehun e historisë si përfaqësues i tendencave anti-kombëtare dhe anti-shtetërore”.

Postimi i plotë i Memli Krasniqit:

Sulmet kundër Ambasadorit amerikan, Greg Delawie, janë sulme kundër vet Shteteve të Bashkuara të Amerikës dhe kur ato vijnë nga cilido qytetar i Republikës së Kosovës, vërtet janë më shumë se neveritëse.

Është paturpësi e llojit të vet edhe tendenca për t’i arsyetuar këto sulme, të cilat nuk janë në frymën e traditës sonë të respektit, mirënjohjes dhe miqësisë me institucionet dhe popullin amerikan e as në frymën e vlerave perëndimore të cilat janë vlera të popullit tonë.

Të gjithë ata që mundohen ta ndryshojnë kursin e miqësisë së përhershme të Kosovës me SH.B.A.-të do të përfundojnë në plehun e historisë si përfaqësues të tendencave anti-kombëtare dhe anti-shtetërore, duke marrë përgjigjen meritore nga qytetarët e vendit tonë, të cilët kurre nuk do të mëshirohen me vlerat kundër-civilizuese, që për fat të keq një grusht njerëzish sot po i promovojnë pa fije turpi.