Shqyrtimi i listës së kandidatëve për Komisionin e Pavarur për Miniera dhe Minerale (KPMM), e propozuar nga Qeveria, ishte temë qendrore në mbledhjen e sotme të Komisionit për Zhvillim Ekonomik, Infrastrukturë, Tregti dhe Industri.

Gjatë shqyrtimit të listës së propozuar, komisioni vlerësoi se kandidatët e paraqitur i plotësojnë të gjitha kushtet profesionale për të qenë anëtarë të Bordit të KPMM-së.

Sipas një njoftimi të Kuvendit të Kosovës, me qëllim që procesi të rrjedhë në harmoni të plotë me Ligjin për KPMM-në, komisioni kërkoi që kandidatët e paraqitur të kompletojnë dokumentet, sikurse është paraparë në pikat: 6.5, 6.6 dhe 6.7 të nenit përkatës të Ligjit për KPMM-në.

Në këtë mbledhje është diskutuar edhe për Raportin e Zyrës së Rregullatorit të Energjisë (ZRRE) për vitin 2014. Lidhur me këtë raport, komisioni vendosi t’i drejtohet ZRRE-së që brenda dy javësh të kompletojë raportin me të dhëna më të detajuara, për çështje të ngritura në mbledhjen e djeshme të komisionit./arbresh.info/