Kryeministri në detyrë, Albin Kurti, ka deklaruar se zgjedhjet lokale të 12 tetorit përbëjnë një referendum për të ardhmen e kryeqytetit.

Përmes një postimi në Facebook, ai ka theksuar se qytetarët e Prishtinës do të vendosin mes “një Prishtine të stagnimit, privatizimit e korrupsionit” dhe “një Prishtine të barazisë, zhvillimit dhe vizionit”.

Sipas Kurtit, zgjedhja e duhur është kandidati i Lëvizjes Vetëvendosje! për kryetar të Prishtinës, Hajrulla Çeku, të cilin ai e ka përshkruar si “njeri të thjeshtë, të përkushtuar, të ditur, të kulturuar e me rezultate të mëdha”.

“Zgjedhjet e 12 tetorit janë referendum për të ardhmen e kryeqytetit. Zgjedhja është e thjeshtë: ose për Prishtinën e stagnimit, privatizimit e korrupsionit, ose për Prishtinën e barazisë, zhvillimit dhe vizionit.
Zgjedhja e duhur është vetëm një: Hajrulla Çeku. Një njeri i thjeshtë, i përkushtuar, i ditur, i kulturuar, e me rezultate të mëdha. Hajra është profesionist i vërtetë. Para së gjithash, me magjistraturë në Qeverisje dhe Zhvillim Lokal, ai e ka dëshmuar veten si një nga ministrat më të mirë që ka pasur Kosova. E mbi të gjitha, është vizionar: me platformën “Prishtina 2035”, ai ka një plan të qartë për një Prishtinë funksionale, të pastër, të gjelbër e përplot jetë.
Me Hajrën kryetar, Prishtina do të bëhet qyteti që frymon zhvillim, kulturë, sport e inovacion.
Më 12 tetor, voto numrin 105 të Lëvizjes VETËVENDOSJE!.
Voto Hajrulla Çekun për Kryetar të Prishtinës dhe njërin nga kandidatët për Kuvendin Komunal.
Bashkë për Prishtinën tonë!2, ka shkruar Kurti./Arbresh.info/