Komisioni Qendror i Zgjedhjeve nuk ka certifikuar sot dy subjekte për zgjedhjet lokale të tetorit.

“Lidhja e Prishtinës” nuk është certifikuar pasi u tha se është brend dhe pjesë e Lidhjes Demokratike të Kosovës, ndërkaq iniciativa qytetare “Lëvizja për Bashkimin e Shqipëtarëve”, për shkak të gabimit drejtshkrimor në fjalën “Shqipëtarëve”.

E lidhur me këtë ka reaguar sot Eugen Cakolli nga KDI.

“KQZ-ja paska vazhduar sot me praktikën (e kahershme) aq sa kundërligjore, aq edhe të pakuptimtë e të çuditshme të cenimit të së drejtës kushtetuese të subjekteve politike për pjesëmarrje në zgjedhje – vetëm për shkak të emrit të tyre.”,  shkruan Cakolli.

Ai tha se me insistimin e LDK-së një iniciativë u refuzua sepse emri i saj i ngjante një slogani të vitit 2017, Iniciativa tjetër u refuzua vetëm pse kishte një gabim drejtshkrimor në emër.

“Asnjë parti nuk ka monopolin mbi brendet, e aq më pak mbi kujtimet e fushatave të kaluara. Në anën tjetër, është qesharake që refuzimi të bëhet për shkak të gabimeve drejtshkrimore, thua ti se anëtarët e KQZ-së janë lektorë.”, tha në fund ai./Arbresh.info