Ekrem Kastrati, i Nismës Socialdemokrate synon edhe një mandat në krye të Malishevës.

Ai e bëri këtë të ditur përmes një njoftimi në Facebook.

“Të dashur qytetarë të komunës së Malishevës,

Sot po ju flas nga zemra, me mirënjohje të madhe dhe me ndjenjën e përgjegjësisë që e kam ndjerë çdo ditë që prej se ma keni besuar udhëheqjen e komunës sonë. Nuk është befasi, as për ju e as për mua, sepse kemi punuar bashkë, sepse kemi ndërtuar një drejtim të qartë, sepse kemi shumë punë përpara: Pra, do të rikandidoj për kryetar të komunës së Malishevës në zgjedhjet e 12 tetorit”, tha Kastrati transmeton Klankosova.tv.

Në mesazhin e drejtuar qytetarëve të Komunës së Malishevës, Kastrati tha se “ky vendim është vazhdimësi e një angazhimi që ka lindur nga terreni nga takimet me ju nga dëgjimi i halleve dhe sfidave tuaja”.

“Unë e di mirë se çfarë i shqetëson qytetarët e Malishevës. E di se ku mungon ende infrastruktura, se ku ka nevojë për më shumë investim, për më shumë ndihmë, për më shumë vëmendje. Por më e rëndësishmja, jo vetëm që i njoh këto sfida, por kam edhe zgjidhje për to. Jo premtime në letër, por projekte konkrete që veçse i kemi nisur dhe të tjera që janë gati për t’u realizuar”, theksoi ai.

“Në ditët në vijim, do të paraqes para jush programin dhe planin tim për katër vitet e ardhshme. Është një program që bazohet në punë konkrete dhe në nevojat që ju vetë i keni shprehur. Një vizion i qartë për një Malishevë që ecën përpara dhe nuk ndalet”.