Katër persona janë arrestuar sot nga Policia e Kosovës nën dyshimin se kanë importuar, eksporuare furnizuar pa autorizim armë ose mjete plasëse.

Në njoftim thuhet se në lidhje me rastin janë bastisur tetë lokacione në Prishtinë, përcjell Arbresh.info.

Njoftimi i plotë:

Me datën 28.05.2025, Policia e Kosovës respektivisht Sektori i Hetimeve i Departamentit të Kufirit, mbështetur edhe nga njësitë tjera relevante, ka zbatuar urdhëresën e Gjykatës Themelore në Prishtinë, nën dyshimin e bazuar për kryerje të veprës penale ‘’Importi, eksporti, furnizimi, transportimi, prodhimi, këmbimi, ndërmjetësimi ose shitja e pa autorizuar e armëve ose mjeteve plasëse”, neni 364 i KPRK-së.

Lidhur me rastin janë bastisur tetë (8) lokacione në rajonin e Prishtinës, ku si rezultat i kësaj, janë gjetur dhe sekuestruar:
• një pushkë automatike AK-47,
• njëzet e tre (23) fishekë,
• dy magazina (karikator),
• një bajonetë,
• një thikë,
• shtatëdhjetë e tetë (78) gram të substancës së dyshuar narkotike,
• si dhe pajisje elektronike, gjithësej shtatë telefonë celularë.

Pas marrjes në pyetje dhe procedurave të rastit, me urdhër të prokurorit të rastit, katër të dyshuarit meshkuj kosovarë janë liruar në procedurë të rregullt./Arbresh.info