Një paciente rreth 40-vjeçare, e hospitalizuar në repartin e hapur të Klinikës së Psikiatrisë në Qendrën Klinike Universitare të Kosovës (QKUK), ka ndërruar jetë si pasojë e vetëvrasjes.

Shërbimi Spitalor Klinik dhe Universitar i Kosovës (SHSKUK), ka dhënë detaje përmes një komunikate për media, ku theksohet se pacientja ka qenë duke marrë trajtim në kushte të përcaktuara nga protokollet mjekësore dhe të drejtat e pacientëve, të cilat parashohin që pacientët në repartin e hapur nuk mbahen të izoluar dhe kanë të drejtë daljeje jashtë.

“Menaxhmenti i QKUK-së, menjëherë pas marrjes së informatës për rastin, ka kërkuar raport të detajuar nga drejtoria e Klinikës së Psikiatrisë,” thuhet në njoftim.

Po ashtu, janë iniciuar procedurat për shqyrtimin e plotë të rrethanave që kanë çuar në këtë ngjarje tragjike.

QKUK ka siguruar opinionin publik se do të ndërmerren të gjitha masat në përputhje me gjetjet e raportit zyrtar dhe se do të vlerësohen të gjitha aspektet që lidhen me sigurinë e pacientëve në klinikë.

“Në funksion të parandalimit të rasteve të ngjashme, do të merren masa konkrete për përmirësimin e mëtejmë të shërbimeve psikiatrike,” përfundon njoftimi./Arbresh.info/

LEXO EDHE:

Policia jep detaje rreth gruas që dyshohet se kreu vetëvrasje në oborrin e QKUK-së