Kampionët në fuqi, Bayer Leverkusen, do të ushtrojnë sa më shumë presion të mundshëm mbi kryesuesit e ligës, Bayern Munich, ndërsa luftojnë për të mbajtur gjallë shpresat për titull, tha trajneri Xabi Alonso përpara ndeshjes së së premtes në shtëpi kundër VfL Bochum, që po lufton për mbijetesë.

Me tetë ndeshje të mbetura, skuadra e Alonsos, e cila sezonin e kaluar fitoi dy trofetë e futbollit gjerman, ndodhet në vendin e dytë në Bundesliga me 56 pikë, gjashtë më pak se Bayern Munich.

“Kjo është jashtëzakonisht e rëndësishme për ne,” tha Alonso në një konferencë për shtyp të enjten.

“Është e qartë se çfarë duhet të bëjmë, dhe kjo është të luftojmë deri në fund. Shansi ynë i parë për të ngushtuar diferencën me Bayernin në tre pikë është nesër,” shtoi ai.

Bayern do të luajë të shtunën kundër St. Pauli në shtëpi.

“Duam të ushtrojmë sa më shumë presion mbi ta,” tha Alonso. “Nëse fitojmë dhe marrim tre pikët, atëherë do të kemi një situatë më të favorshme. Kjo është dëshira dhe ideja me të cilën duhet të futemi në ndeshjen e nesërme.”

Të martën, Leverkusen do të përballet me klubin e kategorisë së tretë, Arminia Bielefeld, në gjysmëfinalen e Kupës së Gjermanisë.

“Jemi pothuajse në prill dhe kam thënë se nëse jemi në një pozicion të mirë në prill, atëherë është momenti për të luftuar për këtë shans,” tha Alonso. “Nuk do të jetë e lehtë, por vullneti dhe dëshira janë aty.”

Ndeshja mes Leverkusenin dhe Bochumit nesër nis me fillim nga ora 20:30./Arbresh.info