Kryeministri i vendit, Albin Kurti ka uruar boksieren Donjeta Sadiku për fitoren e medaljes së artë kundër boksieres nga Kazakistani me rezultat bindës 5:0.

Me anë të një postimi në Facebook, ai tha se Donjeta realizoi tri fitore, duke dëshmuar formën e saj të shkëlqyer dhe nivel të lartë të boksit, shkruan Arbresh.info.

“Donjeta Sadiku ka shkëlqyer në turneun ndërkombëtar të boksit “Strandja 2025” në Sofje, duke fituar medaljen e artë kundër boksieres nga Kazakistani me rezultat bindës 5:0. Gjatë rrugës drejt medaljes, Donjeta realizoi tri fitore, duke dëshmuar formën e saj të shkëlqyer dhe nivel të lartë të boksit. Njëherësh ajo mori titullin e një ndër boksieret më të mira të garës.”, ka shkruar Kurti.

Kurti theksoi se Turniri “Strandja” është një nga turniret më të vjetra të boksit amator dhe këtë vit shënon edicionin e 76-të.

Sipas tij, kjo medalje ka rëndësi të veçantë, ku pas 48 vitesh, Donjeta bëhet boksierja e parë nga Kosova që e fiton të artën në këtë turne, duke ndjekur gjurmët e legjendës Mehmet Bogujevci, i cili e fitoi të artën në vitin 1977.

“Në këtë garë, medalje të bronzta fituan Loris Idrizi dhe Bashkim Bajoku, ndërsa referi ynë ndërkombëtar Latif Demolli po ndan drejtësinë në turne. Urime Donjetës dhe tërë ekipi tonë! Suksese në garat e radhës.”, ka shkruar mes të tjerash kryeministri Kurti./Arbresh.info/