Kandidati i PDK-së për kryeministër, Bedri Hamza ka thënë se Hekurudha e Kombit është projekti i tij më i madh për forcimin e lidhjes mes shqiptarëve.

Hamza ka ndarë një video në llogarinë e tij në Facebook, ku shprehet se kjo kjo linjë hekurudhore moderne duhet të vazhdojë më pas edhe drejt Malit të Zi.

“Hekurudha e Kombit është projekti im i madh për forcimin e lidhjes mes shqiptarëve. Kjo linjë hekurudhore moderne duhet të vazhdojë më pas edhe drejt Malit të Zi, që Kosova ta përforcojë daljen në det dhe lidhjen me shtetet e rajonit”, thotë Hamza.

Tutje ai thekson se Kosovën do ta lidhim me hekurudhë, me Shqipërinë dhe shtetet e rajonit.

“Kosovën do ta lidhim me hekurudhë, me Shqipërinë dhe shtetet e rajonit. Transporti hekurudhor ul ndjeshëm shpenzimet e qytetarëve dhe ndikon pozitivisht në ekonominë e vendit. Redukton ndotjen dhe kontribuon në mbrojtjen e mjedisit. Ne do ta përfundojmë projektin e modernizimit të linjës hekurudhore 10, që lidh Hanin e Elezit me Leshakun. Dhe, pas rrugës së kombit, do ta ndërtojmë edhe hekurudhën e kombit. Kjo linjë hekurudhore moderne që forcon lidhjen mes shqiptarëve duhet të vazhdojë më pas edhe drejt Malit të Zi. Për sa i përket transportit të brendshëm hekurudhor, do ta funksionalizojmë linjën Klinë–Prizren dhe do ta elektrifikojmë rrjetin hekurudhor në krejt Kosovën, duke e rritur shpejtësinë minimale të lëvizjes deri në 120 kilometra në orë”, thotë Hamza./Arbresh.info/