Ministria e Punëve të Jashtme të Francës ka lëshuar një komunikatë për media, duke shprehur keqardhjen për veprimet e Qeverisë së Kosovës në mbylljen e disa institucioneve paralele serbe në disa komuna të Kosovës.

Franca e ka cilësuar si një vendim të njëanshëm mbylljen e strukturave administrative serbe më 15 janar, një veprim ky që sipas tyre do të ketë ndikim negativ në jetën e përditshme të popullatës serbe në Kosovë.

Sipas njoftimit për media thuhet se ky veprim i njëanshëm rrezikon perspektivat e heqjes së masave kufizuese ndaj Kosovës.

“Franca shpreh keqardhjen për mbylljen e njëanshme nga qeveria e Kosovës më 15 janar të një numri të madh të strukturave administrative serbe në Kosovë, vendim i cili do të ndikojë negativisht në jetën e përditshme të popullatës serbe të Kosovës. Kjo rrezikon përpjekjet për normalizimin e marrëdhënieve ndërmjet Kosovës dhe Serbisë në kuadër të dialogut nën patronazhin e Bashkimit Evropian. Ky veprim i njëanshëm rrezikon perspektivat e heqjes së masave kufizuese ndaj Kosovës. Franca bën thirrje për respektimin e angazhimeve të marra nga palët për të përparuar në zbatimin e marrëveshjes Bruksel-Ohër”, thuhet në njoftim./Arbresh.info