Shefi i Grupit Parlamentar të AAK-së, Besnik Tahiri ka mbajtur një konferencë të jashtëzakonshme për media.

Para mediave, Tahiri foli për konferencën e mbajtur sot nga kryeministri Albin Kurti dhe ministri i Financave, Hekuran Murati për rritjen e pagave në sektorin publik.

Këtë rritje Tahiri e quajti si lojë politike në prag të zgjedhjeve duke thënë se kjo është një mashtrim për të blerë një votë më shumë.

“Kosova dhe qeveria i rregullon pagat në sektorin publik me Ligj dhe shumën e rregullon me Ligjin mbi Buxhetin. Rritja e njësive në formë hirarkike të koeficinetit mundet me ndodh vetëm nëse ky Ligj i shtrohet një procesi të amandamentimit në Qeveri e më pastaj në Kuvend. Është manipulim me shërbyes civil dhe kanë pritur që së paku vlera e koeficientit të jetë së paku 130 euro”, deklaroi Tahiri.

Tahiri ka shprehur bindjen e tij se kjo rritje e pagave është e kundërligjshme.

“Ne kërkojmë që të mos ketë lojë, të mos tentohet blerja e votës por të shkohet përmes Ligjit për Buxhetin. Ajo që u tha për rritje të ekonomisë, të na tregojë dikush se në cilën sektorë është rritur ekonomia. Andaj ne nuk e mbështesim rritjen prej 50 euro, për shkak se ky është mashtrim dhe tentim për blerje të votës”, deklaroi Tahiri./Arbresh.inco