Osmani pas takimit me Von der Leyen: Diskutuam Planin e Rritjes, do të kemi në dispozicion mbi 800 milionë euro

12:43 | 26 Tetor 2024
K.B

Presidentja e vendit, Vjosa Osmani pas takimit me presidenten e Komisionit Evropian, Ursula von der Leyen tha se kanë diskutuar për planin e rritjes dhe agjendën e reformave, prej të cilës do të kemi në dispozicion mbi 800 milionë euro.

Osmani ka ritheksuar nevojën për heqjen e masave të padrejta kundër Kosovës.

“Në takim me Presidenten Ursula von der Leyen, e urova për rizgjedhjen e saj në krye të Komisionit Evropian, gjersa ritheksova përkushtimin e vendit tonë për të ecur, bazuar në merita, drejt familjes së bashkuar evropiane. Së bashku diskutuam Planin e Rritjes dhe agjendën tonë të reformave, prej të cilës do të kemi në dispozicion mbi 800 milionë euro. Në këtë frymë, ritheksova edhe nevojën për heqjen e masave të padrejta kundër Kosovës, nga të cilat më së shumti po dëmtohen qytetarët e vendit tonë”, shkroi Osmani në Facebook./Arbresh.info/