Ambasadori amerikan në Kosovë, Jeffry Hovenier ka thënë se ekziston një rrezik real lidhur me hapjen e urës së Ibrit për ushtarët e NATO-s, veçanërisht ata amerikan.

Hovenier i është lutur Qeverisë së Kosovës që në këto momente mos të ndërmarr hapa për hapjen e urës mbi lumin Ibër.

Lexo edhe:

Hapja e urës së Ibrit, Hovenier – Qeverisë: Ju lutemi, mos e ndërmerrni këtë veprim tani – punoni me ne

Ndaj kësaj, ka reaguar kryetari i Aleancës për Ardhmërinë e Kosovës, Ramush Haradinaj, i cili ka thënë se kushdo që i rrezikon ushtarët amerikan në Kosovë nuk i takon Kosovës.

“Kushdo që rrezikon ushtarët amerikanë në Kosovë, as nuk i takon Kosovës dhe as nuk do t’i takojë Kosovës. Është vetëm kundër Kosovës. Dhe, si armik i Kosovës do të trajtohet! Prandaj, ose do të jetë në burg ose do të ikë e fshehet nga Kosova! Pavarësisht çfarë shtetësie ka dhe çfarë detyre ka, ai-ajo-ata do të ndëshkohen”, ka shkruar Haradinaj në llogarinë e tij në Facebook.

“Të gjithë ju që keni përgjegjësi shtetërore, nëse e gjeni veten këtu, pas lutjes (edhe publike) amerikane për Qeverinë e Kosovës, dijeni se s’do ta keni mbrojtje petkun që ju mbështjellë përkohësisht”, u shpreh Haradinaj./Arbresh.info