Kryeministri i Shqipërisë, Edi Rama ka paralajmëruar qytetarët se një lojë mashtruese me kompjutera që imitojnë numrin e telefonit për të dërguar mesazhe të rreme, po dëmton qytetarët shqiptarë.

Në një reagim në rrjetet sociale, Rama  shkruan se nga ky mashtrim kompjuterik u janë marrë para qytetarëve. Ndërkohë që policia ka kryer disa arrestime dhe po vijon aksionin.

Rama paralajmëron të gjithë qytetarët që marrin mesazhe në emrin e personave publikë, që të tregohen të kujdesshëm dhe të mos bien pre e këtyre lojërave kriminale.

“Një lojë mashtruese me kompjutera që imitojnë numrin e telefonit për të dërguar mesazhe të rreme, ka dëmtuar disa persona deri më sot. Policia e Shtetit ka ndaluar dhe çuar para drejtësisë disa prej këtyre mashtruesve, të cilët kanë arritur të marrin para prej të dëmtuarve. Por ndërkohë që policia vazhdon punën e saj për identifikimin e të tjerëve, u sugjeroj të gjithë atyre që marrin mesazhe në emrin e personave publikë, të verifikojnë paraprakisht vërtetësinë e dërguesit, që të shmangin kurthin e kësaj loje kriminale”, ka shkruar Rama në llogarinë e tij në rrjetin social “X”./Arbresh.info