Një peshkop dhe disa persona të tjerë janë sulmuar me thikë gjatë një predikimi në Sidney të Australisë, që po transmetohej në internet, raportojnë mediat lokale.

Sipas mediave të huaja, ngjarja thuhet se ka ndodhur mbrëmjen e së hënës në periferi të Wakeley.

Policia iu përgjigj njoftimeve se një numër njerëzish ishin goditur me thikë, por tha se asnjë prej tyre nuk ishte në rrezik për jetën.

Ata shtuan se një burrë ishte arrestuar lidhur me këtë ngjarje, ndërkohë që motivi i sulmit nuk dihet ende.

Gjithashtu nuk ishte e qartë menjëherë se çfarë arme u përdor për sulmin në fjalë, i cili raportohet të ketë ndodhur në kishën Christ The Good Shepherd.

Peshkopi është emëruar nga mediat lokale si Mar Mari Emmanuel.

Në videon e transmetuar drejtpërdrejt në predikim, një burrë i veshur me rroba të errëta mund të shihet duke iu afruar peshkopit përpara se të shfaqet për ta goditur.

Më pas disa persona të tjerë tentojnë të ndërhyjnë dhe dëgjohen të bërtitura.

“Personat e plagosur pësuan lëndime jo kërcënuese për jetën dhe po trajtohen nga mjekët e ambulancës së NSW”, tha Policia në një deklaratë.

Të gjithë të lënduarit mendohet se janë meshkuj të moshës 20 deri në 70 vjeç.

Komunitetit i është kërkuar që të shmangë zonën ku ndodhi ngjarja.

Goditja me thikë vjen disa ditë pasi gjashtë persona u vranë në një qendër tregtare në të njëjtin qytet. Sulmuesi më vonë u qëllua për vdekje nga një oficer policie.

Nuk ka asnjë raportim që dy ngjarjet janë të lidhura me njëra-tjetrën./euronews.al