Kryetari i Aleancës për Ardhmërinë e Kosovës (AAK), Ramush Haradinaj mori pjesë në ceremoninë e zbulimit të busteve të Sala e Hamit Jasharit në Prekaz.

Haradinaj tha se në Prekazin heroik, çdo shtëpi ka një histori dhe se Sala e Hamit Jashari u bënë simbole simbole të qëndrueshmërisë dhe gatishmërisë për sakrificë.

“Në Prekazin heroik, çdo shtëpi ka një histori. Shembulli i qëndresës heroike të Baces Shaban, Ademit e Hamzës, nuk ishte i vetëm. Shtëpia e Hamit e Sale Jasharit ishte shndërruar në strehë të sigurt për celulat e para të Ushtrisë Çlirimtare të Kosovës. Luftëtarët e lirisë, gjetën aty ngrohtësinë, por edhe frymëzimin për të vazhduar në rrugën e lavdisë. Në kohën kur nëna Sale dhe baci Hamit, ishin bërë simbole të qëndrueshmërisë dhe gatishmërisë për sakrificë, ata hynë në faqet e historisë sonë kombëtare, për të mbetur aty, si yje ndriçues për brezat që vijnë”, shkruan Haradinaj në Facebook.

Haradinaj thotë se në vendin ku ata i falën jetën Atdheut, sot zbuluam bustet e tyre, që simbolizojnë sakrificën shekullore të familjeve shqiptare për liri e bashkim.

“Pikërisht në vendin ku ata i falën jetën e tyre Atdheut, sot zbuluam bustet e tyre, që simbolizojnë sakrificën shekullore të familjeve shqiptare për liri e bashkim. Nëna Sale e baci Hamit, ju faleminderit për shërbimin”, shkruan ai./Arbresh.info/