Eventi i Final 8 Kupës së Kosovës, vazhdon edhe sonte në qytetin e Gjakovës.

Pas dy super dueleve ditën e djeshme, ku Bashkimi triumfoi ndaj Pejës dhe Prishtina ndaj Prizrenit, tani është radha e gjysmëfinaleve, shkruan Arbesh.info.

“Shani Nushi” pritet të jetë akoma më i zjarrtë sonte duke filluar nga ora 17:00 me ndeshjen e parë gjysmëfinale mes Trepçës dhe Golden Eagle Yllit.

Në rrugën për gjysmëfinale, mitrovicasit fituan lehtë ndaj Istogut, kurse suharekasit mposhtën Vëllaznimin, në konakun e tyre.

Një ndeshje që gjithmonë ka prodhuar emocione të mëdha dhe sfida dramatike.

Kjo sfidë njëherit edhe do të përcaktojë finalistin e parë të Kupës së Kosovës për vitin 2024.

E menjëherë pas kësaj ndeshje me fillim nga ora 20:00, takohen dy rivalët e vjetër Bashkimi dhe Prishtina për të përcaktuar finalistin e dytë.

Bashkimi në çerekfinale bëri një punë të madhe duke eliminuar kampionin në fuqi Pejën, kurse kryeqytetasit mposhtën lehtë Prizrenin.

Finalja e madhe e Kupës së Kosovës do të luhet në ditën e Pavarësisë së shtetit tonë me datë 17 shkurt, me fillim nga ora 17:00./Arbresh.info/