Presidentja e vendit, Vjosa Osmani, ka thënë se Kosova po e përmbyllë një vit në të cilin padrejtësisht e në mënyrë të dhunshme u humbën shumë jetë grash.

Osmani për rastin e Liridona Ademajt është shprehur se kjo është plagë e rëndë e shoqërive anë e mbanë botës.

“Liridona Ademaj është emri që kumbon fort, si përkujtim i çdoditshëm i dhimbjes përvëluese që ngelet pas, kur padrejtësia zë vend fuqishëm. Kjo tashmë është plagë e rëndë e shoqërive anë e mbanë botës. Ta kemi të qartë njëherë e përgjithmonë, dhuna me bazë gjinore nuk është thjesht një çështje e grave është test për njerëzimin e një krizë shoqërore që kërkon angazhimin tonë të palëkundur për ndryshim”, ka shtuar Osmani.

Sipas Osmanit, dhuna me bazë gjinore është një njollë e patolerueshme në ndërgjegjen e shoqërisë sonë.

“Duhet të fuqizohet çdo hallkë në institucionet e sigurisë e ato të drejtësisë në përballje me këtë fenomen. Në thelb, një sistem i fortë drejtësie nuk është thjesht një imperativ ligjor; është një gur themeli në përpjekjet tona më të gjera shoqërore për të çmontuar rrënjët e dhunës me bazë gjinore”, u shpreh Osmani./Arbresh.info