Liverpooli ka fituar në udhëtim te Crystal Palace me rikthim 2-1 në ndeshjen e vlefshme për javën e 16-të në Ligën Premier.

Reds kanë marrë një fitore të madhe në udhëtim te klubi londinez dhe kështu janë bërë lider të ri të kampionatit elitar anglez.

Pjesa e parë e ndeshjes u karakterizua me lojë shumë të hapur nga të dyja skuadrat dhe me shumë raste, por asnjëra nuk arriti ta gjej golin duke shkuar në pushim me rezultat 0-0.

Në pjesën e dytë, gjithashtu u zhvillua lojë e hapur dhe me raste, por kësaj radhe pati edhe gola nga të dyja anët.

Të parët në epërsi kaluan vendasit me anë të Jean-Philippe Mateta (57’), i cili shënoi nga pika e bardhë për 1-0, por në minutën e 75-të mbeten me një futbollistë më pak dhe nuk arritën ta mbajnë epërsinë.

Fillimisht ishte Mohamed Salah (76’), i cili shënoi nga afërsia për barazimin 1-1, ndërsa Harvey Elliot (90+) shënoi golin e fitores 2-1.

Pas kësaj fitore, Liverpooli kalon në pozitën e parë me 37 pikë, ndërsa Crystal Palace renditet në vendin e 14-të me 16 pikë.

Në ndeshjen e ardhshme, Liverpooli e pret rivalin e urryer Manchester Unitedit, ndërsa Crystal Palace udhëton te Manchester City. /Telegrafi/