Sot, është bërë një muaj që nga sulmi terrorist i 24 shtatorit, ku humbi jetën heroi, Afrim Bunjaku.

Lidhur me këtë, ministri i Punëve të Brendshme, Xhelal Sveçla ka thënë se me këtë sulm Serbia rikonfirmoi që ambiciet e saj për territorin tonë as nuk i ka zbehur as nuk i ka harruar që nga koha e kasapit të Ballkanit Millosheviq, shkruan Arbresh.info.

“Sot janë bërë 1 muaj nga sulmi terrorist në Banjskë të Zveçanit, sulm ky i organizuar dhe financuar nga shteti i Serbisë. Ky sulm i realizuar nga grupe të trajnuara e të armatosura rëndë nga Serbia, mori jetën e Rreshter Afrim Bunjakut dhe kishte për qëllim të realizonte atë që Rusia bëri në Donbas, aneksimin e veriut të vendit tonë. Të gjitha faktet që dëshmojnë përfshirjen e plotë të Serbisë në këtë sulm terrorist i kemi ofruar për qytetarët tanë e për opinionin ndërkombëtar. Me këtë sulm, Serbia rikonfirmoi që ambiciet e saj për territorin tonë as nuk i ka zbehur as nuk i ka harruar që nga koha e kasapit të Ballkanit Millosheviq.”, ka shkruar Sveçla.

Tutje ministri Sveçla tha se se Radojçiq, lideri i grupit terrorist, edhe pasi ka pranuar pjesëmarrjen dhe udhëheqjen e sulmit pas publikimit të dëshmive, është liruar menjëherë nga autoritetet e Serbisë.

“Lideri i sulmit të 24 shtatorit, kryekrimineli dhe bashkëpunëtori më i afërt i Presidentit të Serbisë, Milan Radojçiq, edhe pasi pranoi pjesëmarrjen dhe udhëheqjen e sulmit pas publikimit të dëshmive tona, u lirua menjëherë nga autoritetet e Serbisë dhe ka refuzim të dorëzimit të tij tek autoritetet tona të drejtësisë.”

Ndër të tjera, Sveçla përmendi edhe shpalljen e tre ditë zie në Serbi për tre terroristët që u neutralizuan nga zyrtarët policor të Kosovës.

“Për më keq, Serbia shpalli tre ditë zie për tre terroristët që u neutralizuan nga zyrtarët tanë policor gjatë ballafaqimit të armatosur. Këto fakte dhe jo vetëm, dëshmojnë fuqishëm që Serbia sponsorizon me të gjitha kapacitetet e saj terrorizmin në rajon. “, është shprehur ministri Sveçla.

Ministri Sveçla tha se pa sanksionimin e Serbisë dhe ndëshkimin e 24 shtatorit stimulohen akte të tilla që cenojnë integritetin e shteteve fqinje.

“Me 24 shtator Republika jonë triumfoi kundër terrorit të Serbisë. Pa sanksionimin e Serbisë dhe ndëshkimin e 24 shtatorit e ardhmja nuk është e përcaktuar qartë për paqe dhe demokraci në rajon. Pa sanksionim të Serbisë në fakt stimulohen akte të tilla që cenojnë integritetin e shteteve fqinje.” , tha ai.

“Heroi Afrim Bunjaku me rënien e tij në ballafaqim me grupet terroriste mbrojti vendin tonë e qytetarët tanë si dhe shpërfaqi kriminalitetin e terrorizmin e sponsorizuar nga Serbia që e kemi thënë prej kohësh.”, përfundoi Sveçla./Arbresh.info/