Ministri i Punëve të Brendshme, Xhelal Sveçla ka vizituar sot shtëpinë e djegur të qytetarit serb në fshatin Veriq të Istogut.

Bashkë me Sveçlën të pranishëm ishin edhe Policia e Istogut si dhe Njësia Rajonale e Hetimeve nga Peja, shkruan Arbresh.info.

Përmes një postimi në rrjetin social Facebook, Sveçla ka kërkuar që sa më parë të zbardhet rasti si dhe u ka ofruar ndihmë policisë për këtë rast.

Postimi i plotë I Sveçles:

Sot së bashku me eprorët e Policisë së Istogut dhe Njësitin e Hetimeve Rajonale nga Peja vizitova shtëpinë e djegur të qytetarit të komunitetit serb nga fshati Veriq.

Kam kërkuar që të gjitha resurset e nevojshme të angazhohen në mënyrë që rasti të zbardhet sa më parë, ndërkaq edhe njëherë i ofrova Policisë gatishmërinë e plotë për të ndihmuar në lidhje me këtë rast.

Republika e Kosovës është dhe do të mbetet demokratike, vend ku jetojnë qytetarët të lirë e të barabartë, pa asnjë dallim përkatësie a prejardhje. Dhe për këto vlera do të jemi të pakompromis./Arbresh.info