Kryetari i Partisë Demokratike të Kosovës, Memli Krasniqi, i ka vizituar sot dy kryetarët e komunave në veri të Kosovës, Ilir Pecin e Zveçanit dhe Izmir Zeqirin e Zubin Potokut.

Krasniqi përmes një postimi në Facebook, bëri të ditur se ka parë nga afër sfidat dhe vështirësitë me të cilat po përballen kryetarët e rinj, përcjell Arbresh.info.

“Sot, vizitova Zveçanin dhe Zubin Potokun, ku takova kryetarët e këtyre dy komunave, Ilir Pecin në fshatin Kelmend dhe Izmir Zeqirin në fshatin Çabër. Pashë nga afër sfidat dhe vështirësitë me të cilat po ballafaqohen jo vetëm Kryetarët e komunave, por edhe qytetarët shqiptarë në këto vendbanime”, tha Krasniqi.

Krasniqi e ritheksoi edhe njëherë mbështetjen e plotë të partisë ndaj Pecit dhe Zeqirit.

“Të dy kryetarët i falënderova për përkushtimin, sakrificën dhe vullnetin, që, përkundër kushteve jo adekuate, detyrën e tyre ta ushtrojnë me durim, përgjegjësi dhe në mënyrë gjithëpërfshirëse, duke kontribuar në paqe dhe shtensionim të situatës në komunat e tyre. Para se gjithash, sot, Izmir Zeqiri dhe Ilir Peci janë në shërbim të qytetarëve, të komunave të tyre dhe të shtetit të Kosovës. Dhe, për këtë, ata gëzojnë mbështetjen e plotë timen dhe të Partisë Demokratike të Kosovës”, tha Krasniqi./Arbresh.info