Ish presidenti i Kosovës, njëherësh edhe kreu i AKR-së, Behgjet Pacolli ka reaguar për situatën në veri të vendit.

Në reagimin e tij Pacolli ka shkruar se Policia e Kosovës dhe Forcat e Sigurisë përdoren nga krerët e shtetit vetëm për veprime populiste.

“Më vjen keq për policinë e Kosovës, forcat e sigurisë dhe organet dhe institucionet tjera të vendit që krerët e vendit i përdorin për veprime populiste të tyre, pa asnjë plan, pa koordinim me faktorin vendor, miqtë tanë ndërkombëtarë dhe SHBA-të e rezultatet nga këto veprime po e damtojnë Kosovën dhe po kthehen si bumerang duke e rrënuar atë që është ndërtuar për 20 vjet”, tha Pacolli.

Tutje ai ka thënë se edhe fëmijët e dinin se në veri nuk kishte kushte për të bërë zgjedhje.

“Kështu ndodhi me dërgesën e policisë speciale ne veri, (e tërhoqëm në këmbim të kushteve të vendosura nga banditët e veriut), kështu ndodhi me “legjitimimin e targave të paligjshme” dhe kjo që po ndodh tani me terhjekjen e kryetareve te sapozgjedhur dhe me forcat tona policore. Edhe fëmijët e dinin qe ne veri te vendit nuk kishte kushte për të bërë zgjedhje”, vijon shkrimin ai.

Pacolli tha se liderët e vendin dinë ta përdorin vetëm gjuhën populiste por me veprime që po i shkojnë në dobi Vuçiqit./

“Po me vjen keq qe kjo po ndodh këtu ne Kosovë, liderët tanë dinë te përdorin vetëm gjuhen populiste, por me veprime që po i shkojnë në dobi Vuçiqit! Vërtet nuk e di ku po shkon Kosova!”, ka përfunduar ai./Arbresh.info/