Kreu i PDK-së, Memli Krasniqi, gjatë vizitës në SHBA, është takuar me udhëheqësit e Korporatës së Sfidave të Mijëvjeçarit (MCC), për të diskutuar mbarëvajtjen e programeve investive të kësaj organizate në Kosovë.

Krasniqi përmes një postimi në Facebook theksoi se është për keqardhje që Kosova e ka mbyllur derën për investimet përmes MCC në infrastrukturën e gazit.

“Sot, në Washington DC, u takova edhe me udhëheqësit e Korporatës së Sfidave të Mijëvjeçarit (MCC), për të diskutuar mbarëvajtjen e programeve investive të kësaj organizate në Kosovë”, shkruar Krasniqi.

“Shpreha falënderimin e thellë për investimet e deritashme nga programi Threshold, veçanërisht ato që ishin të fokusuara në efiçencë. Edhe lagjja ime e fëmijërisë Ulpiana sot ka marrë një pamje të re falë MCC-së”, shtoi ai.

“PDK do të përkrah plotësisht proceset e programit të ardhshëm Compact, por është për keqardhje që Kosova ka mbyllur derën për investimet shumë të nevojshme përmes MCC në infrastrukturën e gazit dhe në prodhim të rrymës përmes gazit”, tha Krasniqi.

Ai shtoi se Kosova ka nevojë për strategji afatgjate në sektorin e energjisë.

“Kosova ka nevojë për strategji afatgjate për sektorin e energjisë dhe çdo vonesë në hartimin dhe zbatimin e saj shkakton vonesa në adresimin e krizës energjetike dhe në sigurinë e furnizimit – faturën e rritur të së cilës do ta paguajnë qytetarët”, përfundoi ai./arbresh.info/