Kryeministri i Republikës së Kosovës, Albin Kurti, është shprehur i kënaqur me seancën e sotme të Kuvendit të Kosovës, ku u votua në lexim të parë të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme, si dhe u miratuar Projekt-kodi i Procedurës Penal.

Kurti përmes një postimi në Facebook i ka falënderuar të gjithë deputetët e Kuvendit të Kosovës që votuan për këto dy Projektligje, shkruan arbresh.info

“Me votimin e sotëm në lexim të parë të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme, ecim bashkë drejt mundësimit të konfiskimit civil (pa dënim) të pasurisë që nuk justifikohet dot. I falënderoj deputetët e Kuvendit për këtë votim me të cilin iniciuam themelimin e një mekanizmi të rëndësishëm me diskrecion për të hetuar pasurinë e të gjithë personave zyrtarë. Me rekomandimet e vlefshme të Komisionit të Venecias, ky Projektligj do të standardizohet plotësisht në përputhje me praktikat më të mira ndërkombëtare dhe, po ashtu, do ta rrisë efikasitetin e luftimit të korrupsionit, siç ka qenë zotimi ynë e për të cilin jemi maksimalisht të përkushtuar”, shkruan Kurti.

I pari i Qeverisë së Kosovës nuk la pa përmendur edhe diskutimin rreth rrezitjes së tij në Greqi.

“Me fjalë të tjera, ishte një seancë e suksesshme në të cilën më së paku kishte rëndësi sa kujt i dukesha i rrezitur unë. Ndërkohë, procesi i vettingut në sistemin e drejtësisë është një çështje tjetër, dhe konsultimet me partitë opozitare për të sigurisht që duhet të vazhdojnë”, shkruan Kurti./arbresh.info/

Postimi i plotë