Krivokapiq nuk pranon t’ia dorëzojë në formë protokollare detyrën Abazoviqit

17:00 | 30 Prill 2022
Lorik Gerbeshi

Ish-kryeministri i Malit të Zi, Zdravko Krivokapiq, ka refuzuar që t’ia dorëzojë detyrën kryeministrit të ri Dritan Abazoviq sipas protokollit.

Krivokapiq ka thënë se nuk ka dëshiruar t’ia dorëzojë detyrën dikujt që, sipas tij, nuk ka legjitimitet për postin e kryeministrit, raportojnë mediat malazeze.

Në vend të pranim-dorëzimit të detyrës, ish-shefi i ekzekutivit malazez i ka lënë një mesazh në zyrë shefit të ri.

“Kjo, meqë kemi pasur shkelje kushtetuese dhe të procedurave. Nuk dua t’i jap legjitimitet shkeljes demokratike dhe ligjore. E lashë një mesazh të qartë në kabinet sa i përket tranzicionit”, ka deklaruar ai.

Dritan Abazoviq u zgjodh kryeministër para dy ditësh pasi mori shumicën e votave në Parlamentin malazez duke u bërë kryeministri i parë shqiptar në Malin e Zi.